Agurren garrantziaz
Hil Argi Elkartetik agurrak egitearen garrantzia zabaldu nahi dugu. Agurrek – edo omenaldiek, zentzu berarekin erabiliko baititugu bi hitzok – hil den pertsonak gugan izan duen garrantzia azpimarratu eta omenaldia egiteko, agurrean partaide direnen emozioak adierazteko modua eskaintzeko, eta besteak beste, heriotzaren esanahiak partekatzeko balio dute.
Pertsona bakoitzak heriotzaren aurrean ere bere modua du, eta orain arte gure herrian ohituraz egin izan diren agur erlijiosorik nahi ez duenak sarri agurrik ez egitea erabakitzen du, eskura beste aukerarik ez dugulako. Herrietan agurrak egiteko baliabideak garatu bitartean (lekuak, bideratzaileak, soinu eta irudi baliabideak,…), norberak nola nahi duen erabaki eta antolatu beharko ditu.
Borondatezko partaideekin osatutako talde bat lanean ari da agurrak egiteko oinarrizko informazioa bilduko duen gida osatzen. Talde horretan parte hartu nahi izanez gero, jarri gurekin harremanetan: + 34 644 357 368 telefonoan edo hilargi@hilargi.eus helbidera idatziz.
Hizkuntza sinbolikoak eta kultur sorkuntzek agurrak egiterakoan duten garrantzia
Hizkuntza sinbolikoa:
Argazkiak, loreak, kandelak, hitza eta isiltasuna,… Sinboloek eragin handia dute norbanakoaren kontzientzian eta inkontzientean, eta taldean eginda, indar handia dute esanahiak partekatzeko. Betidanik erlijioek erabili izan dutena da baina ez da beraiena bakarrik, hizkuntza unibertsala eta humanoa baita. Gizarte mailan berreskuratu eta erabiltzea proposatzen dugu.
Kultur sorkuntzak:
Kantua, musika, bertsoa, dantza,… Aisialdi hutsa baino haragokoa da beraien indarra. Pertsonaren izatearen muineko jarduna dira eta humanitatea performatzeko moduak osatzen dituzte. Osasun-terapietan ere erabiltzen dira, muin horren adierazgarri. Hil den pertsonaren bizitzaren esanahiak osatu eta eraikitzeko modu bezala erabiltzea proposatzen dugu.
